رئيس الوزراء يكرم عمال المقاولون العرب المهندس محسن صلاح : شكراً.. أنتم شركاء النجاح فى إنجاز كل مشروعتنا
عمال المقاولون العرب هم الأساس الذى بٌنى عليه أسم شركة المقاولون العرب .... بعرقهم وسواعدهم وأخلاصهم تزداد أزدهاراً وقوة ..... وبإفتتاح أحد مشروعات الشركة الحيوية والقومية .... هنا نقول لعمالنا تعالوا داخل الكادر لتكتمل الصورة مع المهندس ابراهيم محلب رئيس مجلس الوزراء وكبارقيادات الدولة والشركة .... لنقول لكم شكراً نحن نلمس أخلاصكم وتفانيكم فى العمل ونرى قناعتكم بأن العمل عبادة وأن الإنسان خلق ليعمل ويشقى للحصول على لقمة العيش ... فأنتم تعرفون الواجب قبل معرفة الحقوق .... نحن نشكر من يمثلكم خير تمثيل وهؤلاء هم الـ 5 عمال المكرمين فى إفتتاح مشروع جراج التحرير
** هانى محمد شعبان كهربائى تركيبات بإدارة المنشآت المتميزة : أطالب بتكوين فرقة من العمال المهرة فى التخصصات المختلفة وذلك لتحفيز باقى العمال للإنضمام لهذه الفرقة * أية حكاية الفرقة اللى بتطالب بيها؟
هى عبارة عن مجموعة تشمل جميع التخصصات من العمال المهرة والتى نحتاجها فى جميع الأعمال لإنجاز المهام الصعبة بأسرع وقت وأعلى كفاءة ويكون هؤلاء مميزين عن باقى العمال لتكون حافز للعمال للإجتهاد والجد فى العمل للإنضمام لهذه الفرقة .
* كان أحساسك أيه لحظة تكريمك؟
أن تعبى وبذلى أقصى طاقة ومجهود ماكانش على الفاضى وأنا خدت مقابل تعبى ، عشان أجتهد أكتر وأكتر
* قابلتك أى صعوبات فى تنفيذ جراج التحرير ؟
طبعاً كان فيه صعوبات كتيره أنا بدأت العمل فيه من 4 سنيين وكان الشغل 8 ساعات فى الوردية ومن سنتين تم ضغط العمل لـ 12 ساعة فى الوردية لتعويض أيام المظاهرات الكتيره اللى كانت فى ميدان التحرير وكنت مستمر فى شغلى برغم المخاطرة وكان المولوتوف بيترمى علينا فى الموقع بس أنا ماكنتش بخاف وكنت مبتأخرش عشان الشغل ميتعطلش .
* طبيعة شغلك أية فى جراج التحرير؟
أنا كهربائى تركيبات وبدأت من أول أعمال الكهرباء فى المشروع حتى التركيب النهائى والأستشارى كان بيشوف الشغل وبيكون مبسوط منه وعشان كده قال أنا عايز الناس ديه لنهاية المشروع وكان طقم الكهرباء حوالى 35 عامل .
* أنت تم اختيارك للتكريم من وسط العدد الكبير ده ؟
عشان أنا ملتزم وبنفذ التعليمات بجدية وبسرعة من المهندس أحمد فاروق مدير قسم الكهرباء بالإدارة والمهندس هشام رضا مهندس التنفيذ بالمشروع يعنى أنا فى الوقت اللى غيرى بينفذ بند واحد أو أتنين أكون أشتغلت خمسة لأنى من صغرى وأنا كهربائى وعمرى دلوقت 34 سنة وبرغم أنى ما خدتش الدبلوم إلا إنى شارب المهنة ولكن للأسف عدم حصولى على المؤهل سبب فى عدم ترقيتى ونفسى مشكلتى تلاقى حل إن شاء الله و كل رؤسائى يشهدوا بكفاءتى وأنا أول المتكرمين من المهندس ابراهيم محلب وده أعتبره تاج على رأسى ، ونفسى كمان يوفروا لكل عامل عدة شغل تكون بتاعته ويكون مسئول عنها زى شركات كتير بره مصر وده هيخلى فيه سرعة فى الإنجاز .
* * حسن عيسى عبده فنى شدات معدنية بإدارة الأعمال الإعتيادية : والدى شغال فى الشركة ومكانش مصدق أنى أتكرم من المهندس ابراهيم وأنا عندى 25 سنة * أنت أحد العاملين فى مشروع جراج التحرير وأحد المٌكرمين ؟
أنا كنت فرحان جداً إنى هسلم على رئيس الوزرا وهيكرمنى ووالدى بيشتغل فى إدارة التشطيبات وكان مش مصدق لأنى سنى صغير بس الحمد لله أنا طول عمرى مجتهد وبحب شغلى واللى كتبهولى ربنا هو اللى هيكون .
* وشغلتك أيه فى المشروع ؟
أنا فنى شده معدنيه بإدارة المنشآت المتميزة وأشتغلت فى المشروع سنة وبعدين سافرت الكويت أشتغل فى مستشفى جابر الصباح ورجعت تانى على جراج التحرير وكان فيه صعوبة فى إنهاء الشغل فى أقل وقت تعويضاً عن أوقات التوقف أيام المظاهرات .
* مين اللى رشحك للتكريم ؟
الكوماندا أحمد عبد المعطى والمهندس محمد عبد الله مهندس الأعمال الإعتيادية بالمشروع وأنا بنفذ التعليمات بدون معارضة ولو عندى ملاحظة فى اللوحة بقولها قبل مانفذها وده هيوفر فى الوقت طبعاً مع الإلتزام بكل وسائل السفتى فى أثناء الشغل ، والحمد لله أنا بفهم كل اللوحات وبشتغل عليها بإلتزام وكفاءة عالية وأنا بنصح زملائى بإتقان العمل عشان يدخل بيته رزق حلال .
* أشتغلت فى أماكن تانية قبل الشركة ؟
أشتغلت فى القطاع الخاص باليومية يعنى على باب الله يوم شغل وعشرة لأ وده ما بيوفرش الآمان ليه ولعيالى ولو حد حصلُه حاجة بيتعالج على حسابه أمافى الشركة فى أى وقت يحصل حاجة حتى لو نص الليل متوفر العلاج والأدوية فى مستشفى المقاولون وبيكون على أعلى مستوى ومن غير ماندفع حاجه خالص
عزت شفيق مكاوى مبيض أول بإدارة الصحى والتشطيبات : بنتى الكبيره فى 3 كلية هندسة وأتمنى أن يكون ليها مكان بالشركة * أمتى بدأت شغلك كمبيض تشطيبات فى الجراج ؟
من سنة ونص وده عشان التشطيبات بتيجى آخر حاجة بس كان الشغل متواصل والحمد لله خلص وديماً المهندس ياسر فوزى مدير المشروع والمهندس طارق مرزوق مدير الإدارة يقولوا أهم حاجة السرعة والجودة العالية وده أهم مشروع اشتغلت فيه واشتغل فيه مئات العمال .
* ورأيك أن المشروع مهم ليه ؟
مكان الجراج فى ميدان التحريرو كل مصر مستنية إفتتاحه لأنه هيحل أزمة كبيرة قوى فى المرور.
* طبعاً اشتغلت فى مشروعات كتير قبل كده ؟
اشتغلت فى مشروع التمركز للقوات المسلحة وعقد 16 بالجبل الأصفر ومشروع أبو رواش للصرف الصحى ومشروع مصنع الشرقية للدخان ومشروع المدارس المتميزة بـ 6 أكتوبر .
* أولادك أد أيه ياعم عزت ؟
أنا ربنا أكرمنى فى عيالى بنتى الكبيرة ماشاء الله فى 3 كلية هندسة ومستنى اليوم اللى تتخرج فيه وتشتغل فى المقاولون العرب وعندى تلاته تانيين كلهم فى المدارس وإن شاء الله يطلعوا زيها .
عاطف على غريب سباك ممتاز بإدارة المنشآت المتميزة : أهم مهندس هو اللى ليه قدرة أن يكون "مٌعلم" للعمال * طريقة الشغل بتفرق من مهندس لأخر؟
المهندسين أنواع فيه مهندس فنى ومهندس تنفيذى لكن أهم مهندس بالنسبة للعمال هو اللى يعطى خبرة للعمال ويكون صبور معاهم ويزود من كفاءتهم فى العمل يعنى يكون مُعلم ليهم ويقدر يقود العمال ويخليهم فريق عمل واحد .
* والدورات التدريبية دورها أيه ؟
أنا خريج دبلوم أعمال صحية وباشتغل فى الأعمال الصحية وطلمبات الرفع وأنا اشتغلت فى القطاع الخاص قبل التحاقى بالشركة ووقتها كنت باخد يومية وينتهى الأمر على كده ، والشركة كيان كبير وطريقة الشغل مختلفة والعمال محتاجه دورات تدريبية ومحتاجه دايماً اللى يعلمها ويسهل عليها طريقة الشغل وده عشان يعرف يقرا اللوحات صح ويعرف يتعامل مع المديرين والإستشارين وأنا نفسى فى دوارات تدريبية لتأهلنى أحقق طموحى وأبقى مشرف .
* وبالنسبة لعملك فى مشروع جراج التحرير ؟
كان من سنة والشغل يومياً 12 ساعة وكان المشرف محمد بكر والمهندس محمد أبو المحاسن والمهندس تامر فرج رئيس قسم الأعمال الصحية والحريق بالإدارة حريصين على إنجاز العمل بصورة مشرفة لينا كلنا والحمد لله تم على أكمل وجه .
* ومشروع جراج التحرير أهم مشروع اشتغلت فيه ؟
أيوه و إن شاء الله هيجذب السياح لزيارة وسط البلد والمتحف والبازارات الموجودة بميدان التحرير
* والتكريم من المهندس ابراهيم محلب ؟
التكريم ده شرف وسام على صدرى وأنا من بداية عملى بالشركة سنة 2004 وأنا براعى ربنا وضميرى وأن أدخل بيتى قرش حلال
نصر ابراهيم فورمجى ممتاز بإدارة المنشآت المتميزة : مشروع جراج التحرير صعوبته فى حفر الأرض بعمق 4 أدوار تحت الأرض وفترات التوقف نتيجة المظاهرات بميدان التحرير * أنت فورمجى يعنى وظيفتك مهمة أثناء صب الخرسانة ؟
كل واحد من العمال ليه دور ومهم لكن شغلنتى كانت صعبه لأن الجراج كله تحت الأرض فالموضوع مش ممكن يحصل فيه غلط ولو بسيط يعمل كارثة على طول عشان كده كنا حريصين ومنتبهين لكل حاجه وعاملين حسابها .
* عشان كده الشركة بتكرمكم وأنتم أفضل من يمثل كل العمال اللى شاركوا فى المشروع ؟
أحنا بنطالب أن التكريم ده يكون فى كل مشروعات الشركة ويبقى كل العمال عارفين انه فى نهاية المشروع هيتكرم عدد منهم فتكون حافز لكل واحد انه يجتهد ويخلى باله من شغله ويعمله صح .