نتكلم شوية عن ولاد الأصول اللي مبقناش بنقابلهم في حياتنا كتير…...
بتعرف ابن الأصول ازاي ؟؟
أنا أقولك .. أبن الأصول:
*عمره ما ينكر فضل حد بعد فضل ربنا عليه أو ينساه ..
*بيفضل باقي على العشرة لحد آخر لحظة وبيعمل كل اللي عليه وزيادة ..
*مبيردش الأذي بالأذي ..
*وقت الشدة لو احتجته لازم هتلاقيه ويمكن من غير ما تطلب كمان هتلاقيه قدامك ..
*بيساعد الكل من غير اي مصلحه تعود عليه ..
*ابن الأصول كرامته عنده رقم 1 ومستحيل هيقبل اي إهانة .. ونفسه عزيزة عليه فوق ما خيالك ممكن يوديك ..
*أبن الأصول بيعرف يعتذر .. لو غلطان مش بيستكبر .. يقول انا آسف وغلطت فعلًا وغلطه مبيكرروش ..
*أبن الأصول كلمته واحدة , لما يقولك هعمل صدقه ..
*أبن الأصول ضميره من جواه ييتحكم فيه ومبيسلمش ودانه لحد ..
*أبن الأصول صاحب صاحبه جدا .. مستحيل يبيع صاحبه علشان مصلحته ..
*أبن الأصول ملوش في اللت والعجن وكتر الكلام ..
*أبن الأصول بيعرف يعاتب مرة واتنين وثلاثة علشان مش من طبعه انه يفرط في  حد بسهولة .. بس لما بيفرط ربنا ما يوريك عمرك ما هتعرف ترجعه تاني ..
* أبن الأصول ملوش في الحوارات بيقولك في وشك اللي هو عايزه .. وأيه اللي ينفع وأيه اللي مينفعش .. اللف والدوران مش سكته ..
* أبن الأصول لو اتظلم عمره ما يظلم .. بيسيب ربنا يجيبله حقه ..
*أبن الأصول يحب الخير لغيره حتي لو مش هيطول من الخير دة حاجة .. ويفرحلك من قلبه بجد ..
* أبن الأصول ميعديش عليه واجب .. ويديلك حقك من غير ما تطلبه ..
* أبن الأصول يديلك اللي محتاجة عادي جدا .. ويطلع من جيبه لحد اخر قرش معاه .. مبيفكرش في نفسه وبس .. طبعه وأصله الكرم ..
* أبن الأصول مهما كان ناجح أو عنده كتير .. أخلاقه غلباه .. ميعرفش يتغر علي خلق الله ..
* أبن الأصول جواه رحمة وعدل .. ودايما بيحط نفسه مكان غيره ..
*ابن الأصول مش منصب ولاجاه ..
* ابن الاصول اللى بيعمل الأصول ألف تحيه لأولاد الأصول .
أ/غانم محمود