زهق من المشاكل .. 20 سنة جواز .. وفى الأخر أخد قراره رجع من شغله قالت له احضر لك الغدا قال لها لأ أنا عايز أقولك على حاجة متهيألى أنا عملت كل اللى عليا طول السنين اللى فاتت بس أنا مش قادر استحمل زيادة وخايف انى اخسر أكتر من اللى خسرته عشان كده أنا قررت انى أبعد مش هينفع أكمل حياتى معاكى الولاد كبروا وتقدروا تعتمدوا على نفسكم من غيرى وأنا كده كده هاسيب لكم اللى يكفيكم كانت قاعدة قدامه متماسكة كعادتها مافكرتش تدافع عن نفسها رغم إنها عارفة انه بيقابل واحدة تانية كل اللى قالته له محتاجة منك شهر واحد قال لها وايه اللى هيحصل فى الشهر ده قالت له دا أخر طلب إعتبره مكافأة نهاية الخدمة سكت شوية وفى الأخر قال لها شهر واحد مش أكتر بكل كسرة قالت له ربنا يخليك بس أنا عايزاك فى الشهر ده كل يوم تتغدى معانا وبعد الغدا تشيلنى لحد الأوضة قال لها إيه الكلام الغريب ده قالت له دى اول مرة أطلب منك طلب أرجوك أقبل  بكل تغصب قال لها موافق وفى سره بيقول أهو شهر يعدى بالطول ولا بالعرض وبعدها هابقى بحريتى تانى يوم رجع فى ميعاد الغدا وقعد على السفرة بص لولاده وهم بيحطوا الاطباق وأمهم فى المطبخ لقاهم منظمين جداً .. نضاف جداً .. بيحطوا له الاكل بمنتهى الأدب .. قعد ياكل وهو بيراقبهم بعينيه بقاله كتير ما أكلش معاهم لقاهم بيتكلموا مع مامتهم فى حياتهم وظروفهم وهى بكل حكمة بترد عليهم خلّصوا الاكل والولاد دخلوا اوضتهم فضل قاعد مستنى الأم عشان يشيلها لحد الاوضة مر حوالى ساعة وهى واقفة بتنضف المطبخ بعد الغدا وجات له قام لف ايديه حواليها وشالها فى الاول كان مستغرب ومتضايق وصلها الاوضة وخرج علطول عشان يرتب حاله عشان يخرج تانى يوم إتكررت نفس الأحداث كان متخيل إنه هيتعب من شيل مراته بس أخد باله لأول مرة انها خست جداً وبقت هزيلة بس لسة جميلة تالت يوم وهو شايلها بص على شعرها من غير ما تاخد بالها لقاه مليان خصلات بيضا كان فى الاول بيرجع البيت وهو متضايق بس بعد اسبوع بقى يستنى ميعاد رجوعه عشان يطمن على ولاده مر حوالى نص الشهر وكالعادة بعد ما شال مراته لحد الأوضة لقى نفسه مش عايز يخرج جاب كتاب وقعد يقرا فيه جنبها بس أخد باله إن مراته أخدت دوا قال لها إيه دا ودى كانت أول مرة يتكلم معاها من بعد الإتفاق قالت له ابداً دا مسكّن مصدّعة شوية كمّل قراية وإعتذر عن الخروج فى اليوم ده بعدها بيومين وهو شايل مراته كالعادة لقاها لفت إيديها حوالين رقبته ولأول مرة مايبقاش متضايق او عايز الوقت يعدّى عدّوا كمان 10 ايام لقى نفسه بيرفع سماعة التليفون الو انا اسف مش هينفع نتقابل تانى أنا لازم أكون موجود فى البيت كل يوم اليوم اللى بعدها أخد أجازة لأنه كان نفسه يقضى يوم فى البيت جه جواب بإسم مراته دفعه الفضول انه يفتحه لقاه طلب عاجل من المستشفى بالإتصال بيهم للضرورة إتصل بالمستشفى وكانت المفاجأة يا فندم زوجة حضرتك المفروض ترد علينا هتعمل عملية إستئصال الورم ولا لأ الدكتور المعالج قدامه يومين ويسافر وفرصة نجاح العملية لو حد غيره هو اللى عملها ضئيلة جداً  كان بيسمع الكلام ده وشريط بيمر قدام عينيه يومين ويسافر ؟ هم اليومين اللى فاضلين فى المهلة الدوا ماكانش مسكّن للصداع دا كان مخدّر عشان تقدر تتعايش مع الالم  رد عليهم وقال لهم أنا بأكد الحجز وقفل معاهم وقام يجرى على مراته ودموعه بتجرى قبله وطّى على ايديها وباسها حست بيه وصحيت قامت من نومها مخضوضة عليه مالك فيه إيه؟  قال لها خبيتى عليا ليه إنك عيانة إزاى تختارى إنك تعيشى الشهر المهلة بالطريقة دى بدل ما تختارى إنك تتعالجى  قالت له إيه فايدة إنى اخف وافضل عايشة لوحدى انت أصلك كنت واحشنى جداً الشهر اللى عشته معاك كان أحسن مكافأة نهاية خدمة ليا قال لها وحياة كل شعرة بيضا طلعت فى راسك جوا بيتى وحياة ولادى اللى ماحسيتش عمرى بتعب فى تربيتهم عشان كنت سايبهم لك وحياة سنين عمرك وشبابك اللى راحوا وإنتى ساكتة وعايشة عشان خاطر البيت والولاد وحياة كل حباية مسكّن أخدتيها وأنا مش حاسس بتعبك ربنا يمد فى عمرى بس عشان أعوضك اللى أخدته منك خرجوا جرى ع المستشفى خلصوا التحاليل والأشعات المطلوبة والعملية اتعملت ونجحت بس النجاح الأكبر كان فى حياتهم اللى إبتدت بعد العملية لو بيتك نضيف وولادك متربيين كويس لو هدومك نضيفة ومكوية ودولابك ريحته حلوة لو شراباتك موجودة فى مكانها وكتبك مافيش عليها تراب لو كل حاجة من حاجتك بتدوّر عليها وتلاقيها وبتاكل الأكل اللى نفسك فيه يبقى تأكد إن مافيش قوى خفية بتعمل كل ده اللى بيعمل كدة مراتك يابختك لو لسة عندك فرصة تراجع نفسك يا بختك لو قادر تاخد قرارك إنك تعيش أبوّتك صح يا بختك لو عرفت تفتح عينك عشان تشوف الحقيقة بوجهة نظر تانية يابختك لو عرفت تعمل كل ده صدقنى هتفرح أكتر.
ياريت نتعلم نحافظ علي النعمه اللي في إيدينا بدل ما نبص على اللى فى ايد غيرنا .
غانم محمود عبداللطيف