لما تكون ماشى على الطريق وتشوف واحد محنى ضهره وبيحفر فى الإرض والعرق يتصبب منه .... أو لمحت واحد واقف على سقالة أوعلى إرتفاع مخيف وبيشتغل ..... أو شدك منظر واحد طول الوقت وهو شغال بإيده يقطع ويربط الحديد فى بعضه ..... أكيد هما دول عمال المقاولون العرب ..... أصحاب أحلام بسيطة وطلبات قليلة ..... ومع حرارة الشمس الشديدة ومواقع الصحراء القاحلة وفى البرد القارس تلاقيه شقيان عمال يبنى ويعمر .... يجمعهم سمرة العرق والعمل .... فنظره عن قرب لبعض من هؤلاء ... 6 من العمال الذين تم تكريمهم من المهندس إبراهيم محلب فى إفتتاح ميدان المؤسسة بشبرا وهم يتحدثوا عن أنفسهم
**خالد إسماعيل فراج براد تركيبات بإدارة الكبارى : هنشارك فى مشروع قناة السويس . . . لواحنا مش هنشارك اُمال مين.
* أنت واحد من المُكرمين ؟أنا أول ماعرفت من م. رضا خضر مدير المشاريع بالإدارة أنه رشحنى للمهندس إمام عفيفي نائب رئيس مجلس الإدارة رحت يومها قبل المغرب من فرحتى وأنا عارف إن التكريم هيكون الساعة 9 مساءاً وكان آخر يومين فى رمضان الماضى ومكنتش مصدق إن المهندس إبراهيم محلب رئيس وزارة مصر ووزراء كتير معاه.
*وسبب تكريمك أيه؟ أنا مبقولش لأ وبفهم الأول أيه المطلوب منى ،عشان أنفذه صح وبشتغل تحت أى ظروف لحام كهربا ماشى ، لمبه ماشى وبعمل شغل تركيبات فى الكمر المعلق وتركيب عمود خرسانه ، ولأنى عدد أجازتى محدود وبشتغل فى أى وقت حسب حاجة العمل ، يعنى لو المطلوب سهر بسهر ولو المدير مضغوط وعايز يسلم المشروع بتحمل المسئولية وبشتغل يومين ورا بعض .
*أنت بدأت شغلك فى الشركة سنة كام؟ أنا أبتديت يومية 2003 واتثبت فئة من سنة ، والحمد لله انا سنى دلوقت 30 سنة وأشتغلت فى مشارع كتير فى الشركة مصنع تركيبات بكرداسة ، والسقف المغطى بترعة المنصورية و ميدان المؤسسة ودلوقتى شغال فى مشروع طريق الإسكندرية الصحراوى الكيلو 28
*أمتى تدى الشغل حقه وتبذل أقصى ما عندك ؟ لما يكون المدير بيحس بالناس اللى شغاله معاه ، مينفعش أن المهندس يكون كل علاقته بالملاحظين والمشرفين بس ، لازم يبص للى تحت منهم ويبقى مراعى ظروفهم ويقدر يعرف العامل الماهر من غيره ويكون مقدره ، أنا عندى م. رضا و م.علاء بياخدو بالهم من الحته دي قوى ، ولو عندى مشكله بيقدروا يحلوها !!ويقدر يعرف ويميز لو أنا عندى ظروف حقيقة ولا كداب وبهرب من الشغل.
*هل فيه مخاطر فى مهنتك ؟طبعا لازم أشتغل بضمير وعلى أحسن وجه ... عشان مايحصلش من ورايا ضرر وممكن لو التركيبات غلط أو أتكروتت تسبب فى موت زميلى من بعدى ، وأحنا بناخد أجر ...يعنى لازم نراعى ضميرنا .
*لو طلب منك المشاركة فى أى مشروع من المشروعات الكبرى زى مشروع قناة السويس هتروح ؟ لو أحنا مش هنشارك........... آُمال مين هيشارك !!!!!عشان بلدنا نعمل أى حاجه حتى لو عشت بعيد عن مراتى وبنتى الصغيره ، البلد بتحاول تحسن فى أحوالنا ....الحمد لله مفيش مشكله فى العيش دلوقتى النظام الجديد فى التوزيع أجبر التجار على بيع العيش كامل مش زى الأول ودلوقتى بقوا يتحايلو علينا أننا ناخد حصتنا من العيش والزيت والرز فى التموين أحسن من الأول بكتير .... يعنى الواحد مبقاش يتبهدل فى الطوابير
*نفسك تحقق أيه لنفسك ولبلدك ؟ إن شاء الله تكون الشركة أحسن وأحسن وأحنا كعمال بنقدر أن كل مشاريع الشركة مطلوب فيها المهارة مع السرعة وبنواصل العمل صبح وليل عشان المشروع يتسلم فى ميعاده بس مواعيد العمل الطبيعية من 8ص إلى 6 مساءً .
**محمد عبد المنعم هندى رئيس عمال ممتاز بفرع حلوان : المقاولون العرب هى أساس الشغل فى البلد وفيها صنيعية ومهندسين صح
أنت رئيس عمال : أزاى بتقدر تظبط شغلك وأنت أكيد معاك عمال كتير ؟أنا تحت أيدى حوالى 25 عامل من مبيض ونجار وبنا وفورمجى وحداد وعزل وطبعاً أحنا أطلبنا لعمل تشطيبات المحلات فى مول ميدان المؤسسة والوقت كان ضيق جداً ولازم ننفذ وننجز فأنا بفهم الأول المطلوب منى وقبل ما نفذ أقول أنا ممكن أعمل الشغلانه بالطريقة ديه هتختصر الوقت وتكون أسهل فى التنفيذ وإذا وافقوا بنفذ على طول والكلام ده بيفرق من واحد شاطر فى مهنته وواحد على قده ..... ولأن رؤسائى عارفين إنى بتاع شغل ومن سنة 89 وأنا فى الشركة ولو فى تعليمات أو مشكله فى أى مكان يعنى شغل تشهيلات وزى ما حصل فى ميدان المؤسسة كان الشغل ليل نهار ماكناش بنروح.
*أنا فهمت دلوقتى أنت ليه اتكرمت عشان أنت بتاع شغل ؟ أنا اللى رشحنى إني أتكرم رؤسائى المهندس أحمد علام مدير المشروع والمهندس عمرو حامد والمهندس إمام عفيفى وهو ده التقدير وأد أيه الواحد زاده شرف إن المهندس إبراهيم محلب رئيس الوزراء هو اللى مكرمنى.
*هل الشركة بتراعى الظروف الإنسانية للعامل ؟ أيوه العامل بياخد 50 أو 100 جنيه والعامل أقل طبقه وتفرق معاه الخمسه جنيه ......وبيبصوا للتقييم والفلوس وإذا أتقدر مش هغيب أبداً وهيدى الشركه عينيه ومن الناحية الصحية أحنا بنشكر مستشفى المقاولون قوى بتتعامل مع العامل العيان زى المهندس بالظبط وأى حد بيدخل فيها بيبقى زى الفل وأحنا اشتغلنا فى شهر رمضان وكنا بنفطر ونتسحر فى الموقع شغل شغل وده واجبنا أننا نقوم بيه للبلد ..... آمال دى المقاولون العرب هى أساس الشغل فى البلد وفيها صنيعية ومهندسين صح.
**نورالدين فرج عبد الهادى كهربائى أول بإدارة الأعمال الكهربائية :تقديرى ممتاز دائما ونفسى أترقى ..
أنت قلت عايز تترقى تبقى أيه ؟أنا من طموحاتى أن أكون ملاحظ ومن جد وجد وأنا نفسى أترقى وبعمل اللى عليا ومقدم أسافر الجزائر عشان أحسن من مستوى المعيشة ونفسى أقدر أكمل تعليم ولادى لأنى مش عايزهم يتعبوا زى ما تعبت ونفسى يطلعوا أحسن حاجة فى الدنيا.
*بتقول أن وظيفتك تعب وشقى ؟ أنا عن نفسى طول عمرى ملتزم وبوصل قبل ميعاد شغلى بنصف ساعة وبتحمل المسئولية ومبخذلش أبداً رؤسائى فى العمل، عشان كده محطوط فى كادر رقم 1 وأنت عارف إنه يوجد ربط الأجر بالإنتاج ، لكن فى نفس الوقت بيحصل زنقات فى الشغل كتير وبنوصل الليل بالنهار عشان نخلصه ونسلمه
*طبعا أنت أتكرمت عشان أكيد متميز عن غيرك ؟ أنا فى شغل المؤسسه لمدة شهرين متصلين ومن المجهود الزيادة تعبت ودخلت المستشفى وأخدت محاليل وخرجت على طول على الشغل ، وأنا بشكر م. ابراهيم محلب وم. محسن صلاح وم. ابراهيم عز الدين رئيس القطاع وم. هاله كمال مدير الإدارة وم. محمد فهمى وزملاءنا فى المؤسسة اللى ساعدونا فى إنجاز العمل فى الوقت المحدد
*وأشتغلت فى مشروعات إيه تانى ؟ أنا تعيين سنة 99 وخريج دبلوم صنايع يعنى أنا راجل فنى والملاحظ له دور وأنا ليا دور ، وأنا أشتغلت فى حديقة مطار إمبابة لمدة 4 سنوات وأتحولت من أرض فاضية إلى مكان خرافى يشرح القلب ، وتجديدات مبنى جامعة الدول العربية ، ووكالة أنباء الشرق الأوسط
*أتمنى لك التوفيق والتميز دائماً وأنا أتمنى أن تكون الشركة زى ما هيه ويكون الشغل بره مصر وجوه مصر وأتمنى لبلدى كل خير ويكون الأمن أكتر وأكتر وأتمنى من ربنا يسعدنى فى ولادى يارب .
**مصطفى على عبد السميع مبيض أول بإدارة التشطيبات بفرع مدينة نصر :كنت بشوف زملاءنا وهما بيتكرموا من المهندس إبراهيم محلب لما كنت فى غينيا الأستوائية وأتمنيت أكون واحد منهم فى يوم من الأيام وهشترك فى العلاج الأسرى عشان زوجتى.
*أنت سافرت فى شغل خارج مصر ؟ أيوه أن سافرت فى غينيا الأستوائية 6 سنوات بعد ما أتعينت فى الشركة سنة 98 وكنت بشوف زملاءنا وهما بيتكرموا من المهندس إبراهيم محلب وأتمنيت إن يجى عليا الدور وأكون واحد من المكرمين وربنا حقق لى حلمى أنى أتكرم فى إفتتاح ميدان المؤسسة من المهندس إبراهيم محلب ، وكانت سعادتى لا توصف إن جه اليوم وأنا سنى 47 سنة وأتكرم وسط كل الوزراء ورئيس مجلس الإدارة والناس الكبار كلهم وكمان فى أخر أيام رمضان.
*مين اللى رشحك للتكريم ؟أنا يرأسنى كوماندا بياض وبعمل اللى يقوله الكوماندا بالضبط وبجودة وبشتغل ساعات أكبر من طاقتى حتى يوم الجمعة ، وإذا حكم الشغل مفيش أجازات ولمدة شهور ، وأنا هادى فى شغلى ووقت الزنقة تلاقينى دايماً ، وبطلع شغل نضيف
*يعنى اللى رشحك الكوماندا ؟ أيوه بس المهندس أسامه مدير التكميلية بفرع مدينة نصر معاه صنيعية كتير حوالى 30 واحد وعارف هنا مين ينفذ الكلام ويعمل شغل نضيف ، يعنى عارفنى كويس ووافق على ترشيحى.
*هل توجد وسائل متوفرة للأمن الصناعى فى المواقع المختلفة ؟ طبعا يعنى لو أنا بعمل واجة مبنى لازم بستخدم حزام الأمان ولكل شغلانه وسيلة الآمان بتاعتها
*انت عايز تشترك فى العلاج الأسرى بعد 18 سنة فى الشركة ؟ أنا فعلاً بعمل فى الشركة من 18 سنة وعندى 47 سنة ، بس عشان مفيش وقت إنى أروح هنا ولا هنا مكنتش بهتم ، وبعد إصابة زوجتى فى حادثة على الطريق ، عرفت أن الشركة موفرة الرعاية الصحية مش للعاملين بس ولكن لأسرهم كمان وإن شاء الله هشترك ، وأنت عارف إن من عشر سنيين مرتبى كان 300 جنيه وكان بيقضى ولكن دلوقتى الحياة بقت نار وكل حاجه غالية والشركة بتساعد العاملين فى علاج أسرهم وديه حاجه كويسه
**يحيى فتحى لطفى قياس بإدارة الطرق الداخلية : بدأت من الصفر ...... من يومية إلى قياس وإن شاء الله أخصائى مساحة بدرس فى كلية الزراعة .... عشان أكمل فى نفس مجالى
*أزاى بتقدر توفق بين دراستك فى كلية الزراعة وهى كلية عملية ومواعيد شغلك ؟ أنا إنسان طموح ، بعد حصولى على دبلوم تجارة ، بدأت العمل بالشركة 3 سنين يومية وبعد كده مكافأة وكلها شهور وتعين فى شهر مارس القادم .
*ومين رشحك لتكون العامل المثالى ؟ أنا إنتقلت للعمل بإدارة الطرق الداخلية من 9 شهور بعد تركى إدارة المنشاءات المتميزة واللى رشحنى الأستاذ وليد الليثى أخصائى المساحة للمهندس محمد عادل رئيس قطاع فى الإدارة ، ولأنى بحب شغلى عن غيرى وملتزم بالحضور والإنصراف ولا أعطل العمل وأخلص فى شغلى وأتكرمت من المهندس إبراهيم محلب فى إفتتاح ميدان المؤسسة وده شرف ليا وتحفيز على الإجتهاد والإجادة أكثر وأكثر.
*هل تتوافر وسائل الآمان فى العمل ؟ توجد وسائل آمان من طقم السفتى والقميص العاكس والخوذة ويحاول تأمينك وأنت شغال فى الشارع بيكون معاك أكثر من شخص وأكثر من وسيلة.
*من وجهة نظرك أيه الصفات الواجب توافرها فى المدير لنحصل على أكبر إنتاجية للعامل ؟ العامل النفسى مهم جداً ، والإسلوب فى إعطاء الأوامر ، ومعرفة طاقة اللى هينفذوا العمل ، يعنى مينفعش يكلف العامل فوق طاقته ، مثلا يطلب 1،2،3 فى اليوم وهو يعلم جيداً أن الطاقة القصوى ومع توافر الإمكانيات لا يمكن إنجاز إلا 1،2 يبقى الأفضل أن يكون الطلب على قد الإمكانيات ، ومع ضغط الشغل وكثرته والعدد قليل فيوجد إستحاله فى التنفيذ ، أما المدير الذى يراعى ظروف العمل من حرارة الجو ويطلب شغلانه أخرى بعد إنتهاء المهمة الأولى وبعد أخذ قسط من الراحة ولو قليل ويسمح بأخذ الأراء قبل التنفيذ وفى النهاية يكون الهدف هو دقة الشغل .
**أحمد السيد محمد حجاج براد تركيبات ممتاز بإدارة الترسانة البحرية أى واحد يتمنى أن رئيس الوزارء يكرمه ويتصور معاه
*هل وسائل الآمن الصناعى متوفرة ؟ وسائل الآمن الصناعى من خوذة وجوانتى وسفتى والأفرول كلها متوفرة ولكن لطبيعة الشغل يتم إهلاكها بسرعه ، وعشان نكون فى آمان على حياتنا بنروح نشترى على حسابنا لغاية ما تتوافر فى الإدارة .
*أزاى خبرتك ومهارتك بتزيد ؟ الخبرة فى العمل ، يعنى لما أروح مشروعات مختلفة بكتسب مهارات مختلفة غير لما أقعد فى مكان ثابت هيكون كل خبرتى فى الحته ديه بس ، عشان كده الحياة العملية أقوى من الدورات التدريبية فى حل المشاكل التى تواجهنا فى الشغل .
*سبب تكريمك أية ؟ أنا طول عمرى مفيش كلمة بقولها غير "حاضر ونعم وطيب" وباخد أجازات حسب حاجة المشروع ، يعنى ممكن نطبق 20 ، 25 يوم وبعدها تكون الأجازات حسب التقدير وحاجة العمل .
*أكيد فى الشغل كل واحد بيكمل على شغل التانى ؟ طبعاً عشان كده لازم يكون شغل الواحد مظبوط عشان ما يتعبش غيره ، والتعاون والمحبة بين الزملاء ، وانا أترشحت من المهندس فتحى خضر مدير الإدارة والمهندس أحمد فتحى مدير التركيبات الخارجية وسط 300 ، 400 براد بالإدارة .
*وشعورك أية ساعة التكريم ؟ أى واحد يتمنى إن رئيس الوزراء يكرمه ويتصور معاه ويكلمه ، وأنا بشكر جميع المهندسين وزملائى لأن كلنا إيد واحدة وشركتنا طول عمرها ضخمة وعملاقة ومهما كان مفيش حد يقدر يوقفها عن أى حاجه .
*هل بتقابلك صعوبات فى الشغل ؟ لازم تتوفرالمعدات اللى هنشتغل بيها وصيانتها عند الأعطال وتوفير الخامات والمدير القوى يوفر كل مستلزمات العامل من خامات ومعدات ووسائل الأمان ، هنا العامل يبقى مرتاح فى الشغل ويبذل أقصى طاقة عنده ويسلم شغله بجودة عالية ، ولما يلاقى العامل بعد ما سهر أو أشتغل أيام أجازات أنه قبض مكافأة فورية أو حوافز أنتاجية وحس أن فيها حاجة زيادة ولو رمزية تحفزه على الإنتاج والشغل أكتر، وأنا بقول الحمد لله على المرتب والرزق ده بتاع ربنا وبنجتهد والدنيا ماشيه والحمد لله .