الواحة

علوم الحساب

أول علوم الحساب من واحد الى عشـــــــرة  ياما ناس كتير في الحياة عشرة على عشرة
وناس كتير غير كده لو جيت تقدرهـــــــــــم  هاتدي أحسن مافيهم صفر من  عشـــــــــرة
  *واحــــــد وكان عايش نمـــــــام  يفتـــن مابين الناس بكــــلام
  هيروح يانـاس من ربنا فيـــــن  اللــــي لا يغفل ولا بينـــــــــام
  * أتنين وكانوا عايشين في نعيــم  واخدين نصيبهم م التعلـيـــــم
  ولمــــــا عرفوا طريق الكيــــف  مابقاش حليتهم ولا مليــــــــم
  *  ثلاثة كانوا ياناس أخـــــــــــوات  عايشين سوى في تبات ونبات
  دخل الشيطان فرق بينهــــــــــم  وبدل الحب بخلافــــــــــــــــات
  *  أربع بنات أنما حلويـــــــــــــــن  كان سنهم تحت العشريـــــــن
  رفضوا من الخطاب يامـــــــــــا  والقطر عدا بقالوا سنيـــــــــن
  *  خمس فروض قوم صليهـــــــم  في الآخرة وياك تلاقيهــــــــم
  ده العمر أيــــــــــــــام معدودة  شوف انت هاتعمل ايه فيهــم
  *  الستة ست بميت راجــــــــــــل  مدام تصون شرف الراجـــــل
  لو حتى غاب عن عينها سنين  ولا عمرها تبص لراجـــــــــل
  *  السبعـــــــــــة أيام الأسبـــــوع  الحب فيهم مش ممنــــــــوع
  عيش الحياه كلها بالحــــــــــب  مش مستاهلة زعل ودمــوع
  *  ثمانية إتمني الجنــــــــــــــــــه  وقول يارب أكتبهلنــــــــــــــا
  ده الدنيا فانيه ومش دايمــــــه  والآخره بس بأعمالنـــــــــــا
  *  التسعة تسعى لفعل الخيـــــــــر  واهم حاجة تحب الغيـــــــــــر
  متشلش هم ولا تشكـــــــــــــي  طول مانت وياك رب كبيـــــر
  *  العشرة عشرة على عشـــــــرة  للصاحب اللي صان العشـــرة
  ياما ناس قلوبها دهب اصلــي  وناس قلوبها دهب قشـــــــرة 
الشاعر : حسن عزو
عضو جمعية المؤلفين والملحنبن والناشرين – ادارة معامل الشركة

جميع الحقوق محفوظة 2014 © المقاولون العرب | تصميم مركز معلومات الإدارة العليا

المتواجدون الأن 1463 / 24